ሐሰተኛ የትምህርት ማስረጃን ለመከላከል አዲስ የአሠራር ሥርዓት ተዘረጋ።

የሐሰተኛ የትምህርት ማስረጃን ለመከላከል አዲስ የአሠራር ሥርዓት ተዘረጋ።

​የኢፌዴሪ ትምህርት ሚኒስቴር የከፍተኛ ትምህርት ተቋማት ተመራቂዎች የዲግሪ ሰርተፊኬት ህትመት በአንድ ማዕከል ብቻ እንዲከናወን መወሰኑን አስታውቋል።

​የሚኒስቴሩ የከፍተኛ ትምህርት ተቋማት የአስተዳደርና መሰረተ ልማት መሪ ስራ አስፈጻሚ ሰለሞን አብርሃ (ዶ/ር) እንደገለጹት፤ ይህ አዲስ አሠራር በዋናነት ሐሰተኛ የትምህርት ማስረጃን ለመከላከል ያለመ ነው።

​የአዲሱ አሠራር ዋና ዋና ነጥቦች፡-

#​የህትመት ማዕከል፡- ከዚህ ቀደም ተቋማት በየራሳቸው በጨረታ በሚያሸንፉ ድርጅቶች አማካኝነት የሚያሳትሙት አሠራር ለሐሰተኛ ሰነዶች ተጋላጭ በመሆኑ፣ ከእንግዲህ ሁሉም የመንግሥትና የግል ተቋማት ዲግሪዎች በአንድ ማዕከል ብቻ ይታተማሉ።

# ​የደህንነት መለያዎች፡-የሚታተሙት ሰርተፊኬቶች ልዩ መለያ ኮድ (QR Code)፣ ሴሪያል ቁጥር እና ሌሎች ዘመናዊ የደህንነት መጠበቂያዎችን ያካተቱ ይሆናሉ።

#​ተፈጻሚነት፡- አሠራሩ የ2017 ዓ.ም ተመራቂዎችን እና ከዚያ በፊት ተመርቀው ዲግሪያቸውን ያልወሰዱ ተማሪዎችን በሙሉ ይመለከታል።

# ​ጊዜያዊ ማስረጃ፡- በዩኒቨርሲቲዎች የሚሰጠው ጊዜያዊ የትምህርት ማስረጃ (Temporary Degree) አሰጣጥ እንደነበረ ይቀጥላል።

#​የሽግግር ወቅት ድጋፍ፡-አዲሱ ዲግሪ ታትሞ እስኪደርስ ድረስ ለሚቸገሩ ተማሪዎች ሚኒስቴሩ የድጋፍ ደብዳቤ እንደሚጽፍ ተገልጿል።

​በአሁኑ ወቅት ከ160 በላይ በሚሆኑ የፌዴራል ተቋማት ላይ የሐሰተኛ የትምህርት ማስረጃ የማጥራት ስራ እየተከናወነ ሲሆን፣ በቀጣይም በክልል እና በግል ዘርፎች ተጠናክሮ እንደሚቀጥል ተመልክቷል።