"ባህር ስር የሚደረገው የቴክኖሎጂ ጦርነት"

ቴክኖሎጂ ዜና፦ አሜሪካ፣ ብሪታንያ እና አውስትራሊያ ባህር ውስጥ የሚንቀሳቀሱ አዳዲስ ሰው አልባ ድሮኖችን ሊያመርቱ ነው በአሜሪካ፣ ብሪታንያ እና አውስትራሊያ መካከል የተመሰረተውና ኦከስ (Aukus) በመባል የሚታወቀው ወታደራዊ ህብረት፣ በባህር ስር ያሉ የኢንተርኔትና የመገናኛ ኬብሎችን ለመጠበቅ እና ወታደራዊ አቅማቸውን ለማሳደግ የሚያስችሉ የባህር ስር ሰው አልባ ድሮኖችን (Undersea Drones) በጋራ ሊያመርቱ መሆኑን በይፋ አስታወቁ።

 ይህ አዲስ የባህር ስር ሰርጓጅ ድሮን ቴክኖሎጂ (UUV) በፈጣን ፍጥነት ተሰርቶ በሚቀጥለው የፈረንጆቹ ዓመት (በ2027) ሙሉ በሙሉ ለአገልግሎት ዝግጁ ይሆናል ተብሎ ይጠበቃል።ምንም እንኳን የፕሮጀክቱ አጠቃላይ ወጪ ይፋ ባይደረግም፣ የብሪታንያ መከላከያ ሚኒስትር ጆን ሄሊ ሀገራቸው ለዚህ ፕሮጀክት ብቻ 150 ሚሊዮን ፓውንድ (ወደ 201 ሚሊዮን ዶላር ገደማ) እንደምትመድብ ዛሬ በሲንጋፖር በተካሄደው የፀጥታ ጉባኤ ላይ ገልጸዋል።

ይህ የሶስቱ ሀገራት ጥምረት በዋናነት በኢንዶ-ፓስፊክ ውቅያኖስ እና በተለይም ውጥረት በነገሰበት የደቡብ ቻይና ባህር ላይ በከፍተኛ ፍጥነት እያደገ የመጣውን የቻይና ባህር ኃይል ወታደራዊ የበላይነት ለመግታትና ለመመከት የታለመ መሆኑን የፖለቲካ ተንታኞች ይገልጻሉ።

እነዚህ አዳዲስ የባህር ስር ድሮኖች የባህር ወለል መሠረተ-ልማቶችን ከመጠበቅ ባለፈ፣ በጠላት ላይ ድንገተኛ ወታደራዊ ጥቃቶችን ለመሰንዘር፣ የስለላ እና የቅኝት ስራዎችን ለማከናወን እንዲሁም የሎጂስቲክስ አቅርቦቶችን ለማመላለስ የሚያስችል እጅግ ዘመናዊ የሰው ሰራሽ አስተዋፅዖ (AI) እና ሚሳይል ቴክኖሎጂ የታጠቁ ናቸው።በ2021 የተመሰረተው የኦከስ (Aukus) ወታደራዊ ጥምረት የኑክሌር ሰርጓጅ መርከቦችን ለመሥራት ቃል ቢገባም፣ እስካሁን ያለው ጉዞ እጅግ ቀርፋፋ ነው በሚል ከፍተኛ ትችት ሲሰነዘርበት ቆይቷል።