ከፍተኛ የሙስና ወንጀል ያጋለጠችው ታዋቂዋ የሱዳን ጋዜጠኛ ረሻን ኦሺ የ1 ዓመት ዕስራት ተፈረደባት!  

ታዋቂዋ እና ተፅዕኖ ፈጣሪዋ የሱዳን ጋዜጠኛ ረሻን ኦሺ በፖርት ሱዳን በሚገኝ ፍርድ ቤት የአንድ ዓመት የፅኑ ዕስራት እና የ10 ሚሊዮን የሱዳን ፓውንድ የገንዘብ ቅጣት ተበይኖባት ወዲያውኑ ወደ ሴቶች ማረሚያ ቤት እንድትዛወር ተደርጓል። ለዚህ  ውሳኔ መነሻ የሆነው ጋዜጠኛዋ እ.ኤ.አ በ2025 በፌስቡክ ገጿ ላይ ባወጣችው የምርመራ ዘገባ፣ በሱዳን የመንግስት ተቋማት እና ዲፕሎማሲያዊ አካላት ውስጥ የተፈጸሙ ከፍተኛ የሙስና ወንጀሎችን በድፍረት ማጋለጧ ነው። ፍርድ ቤቱ ጋዜጠኛዋን በኢንተርኔት ወንጀል (Cybercrime Law) ስም ማጥፋት በሚል ህግ የፈረደባት ሲሆን፣ ቅጣቱን በገንዘብ መክፈል ካልቻለች ተጨማሪ የስድስት ወር ዕስራት እንደሚጠብቃትም ተገልጿል።

ይህ ያልተጠበቀ የፍርድ ውሳኔ በሱዳን ጋዜጠኞች ማህበር፣ በፕሬስ ነፃነት ተሟጋቾች እና በዓለም አቀፉ የጋዜጠኞች መብት ተሟጋች ድርጅት (CPJ) ዘንድ ከፍተኛ ተቃውሞና ቁጣን በአስቸኳይ ቀስቅሷል። ተሟጋቾቹ ውሳኔው በሀገሪቱ የፕሬስ ነፃነት ላይ የተሰነዘረ ከባድ ጥቃት መሆኑንና ጋዜጠኞች ወደፊት የሙስና ወንጀሎችን እንዳያጋልጡ ለማስፈራራት የታለመ መሆኑን በጽኑ እየገለጹ ይገኛሉ። በተጨማሪም የሱዳን ጋዜጠኞች ሙያዊ ጉዳዮች መታየት ያለባቸው በፕሬስ እና ህትመት ህግ እንጂ በኢንተርኔት ወንጀል ህግ መሆን የለበትም በማለት ጋዜጠኛ ረሻን ኦሺ በአስቸኳይ እንድትፈታ እና የጠበቆች ቡድን ይግባኝ ለማለት ሰፊ እንቅስቃሴ መጀመሩን አስታውቀዋል።