18ተኛው የአዲስ አበባ ዩኒቨርሲቲ ዓመታዊ የመጻሕፍት አውደ-ርዕይ በይፋ ተከፈተ

በምርምር የተደገፉ መጻሕፍትን በማሳተምና በማከፋፈል በትውልድ መካከል የእውቀት ትስስር መፍጠር እንደሚገባ ተጠቆመ። ይህ የተገለጸው ከሰኔ 1 እስከ 7 ቀን 2018 ዓ.ም የሚካሄደው 18ተኛው የአዲስ አበባ ዩኒቨርሲቲ ዓመታዊ የመጻሕፍት አውደ-ርዕይ በይፋ በተከፈተበት ወቅት ነው።

​የንባብ ባህልን ለማበረታታት እና እውቀትን ለትውልድ ለማድረስ በተዘጋጀው በዚህ አውደ-ርዕይ ላይ ከ47 በላይ የመጻሕፍት አሳታሚዎችና አከፋፋዮች የተሳተፉ ሲሆን፣ በሁሉም የእውቀት ዘርፎች የሚያተኩሩ በርካታ ነባርና አዳዲስ መጻሕፍት ለአንባቢያን በቅናሽ ዋጋ ቀርበዋል። በቆይታውም አዳዲስ መጻሕፍት እንደሚመረቁ ታውቋል።

​የዩኒቨርሲቲው ፕሬስ ሚና እና የወደፊት አቅጣጫ ​አውደ-ርዕዩን በንግግር የከፈቱት የአዲስ አበባ ዩኒቨርሲቲ ፕሬዝዳንት ዶ/ር ሳሙኤል ክፍሌ፤ የአዲስ አበባ ዩኒቨርሲቲ ፕሬስ ከ50 ዓመታት በላይ ባስቆጠረው ታሪኩ ጥራት ያላቸውን መጻሕፍት በማሳተምና በማከፋፈል በትውልድ መካከል የእውቀት ትስስር እየፈጠረ እንደሚገኝ አንስተዋል።

​ዩኒቨርሲቲው ወደ ራስ ገዝነት በሚያደርገው ጉዞ ውስጥ የዩኒቨርሲቲውን ፕሬስ አቅም በማጎልበት እና ዘመኑ በፈጠራቸው የገበያ አማራጮች በመጠቀም ተደራሽነቱን የሚያሰፉ ስራዎች ተከናውነዋል።
​ዶ/ር ሳሙኤል አክለውም፣ ከተለዋዋጩ የዘመኑ ሁኔታ ጋር አብሮ በመራመድ ዘመን ተሸጋሪ የሆኑ ሥራዎችን መስራትና በአለም አቀፍ ገበያ ላይ ተወዳዳሪ ለመሆን መንቀሳቀስ እንደሚያስፈልግ አሳስበዋል።