የልብ ህሙማን ማዕከል በአቅርቦት እጥረት ተፈትኗል

የልብ ህሙማን ማዕከል በአቅርቦት እጥረት ተፈትኗል

​የኢትዮጵያ የልብ ህሙማን ህጻናት መርጃ ማዕከል በህክምና አላቂ ዕቃዎች እጥረት ምክንያት ሳምንቱን ሙሉ ሙሉ አቅሙን ተጠቅሞ አገልግሎት መስጠት ማቆሙን አስታወቀ።
​ማዕከሉ ባጋጠመው የዕቃዎች እጥረት የተነሳ ስራውን ለማስተካከል የተገደደ ሲሆን፥ በአሁኑ ወቅት ከሰኞ እስከ ረቡዕ ባሉት ቀናት ብቻ በሙሉ አቅሙ እየሰራ ይገኛል። ነገር ግን ሐሙስ እና ዓርብ አገልግሎት መስጠት አለመቻሉን የማዕከሉ ዋና ስራ አስኪያጅ አቶ ህሩይ አሊ ከብስራት ሬዲዮ ጋር በነበራቸው ቆይታ ገልጸዋል።
​
​የውጭ ጥገኝነት፦ ለቀዶ ህክምና የሚያስፈልጉ አላቂ ዕቃዎች በሀገር ውስጥ ስለማይመረቱና ከውጭ የሚመጡ በመሆናቸው፣ ማዕከሉ በቂ ገንዘብ ቢኖረው እንኳ ዕቃዎቹን በራስ አቅም ገዝቶ ለማስመጣት እጅግ አስቸጋሪ ሆኗል።
​የወጪ መናር፦ የህክምና መሣሪያዎችን ለመጠገን፣ ሀገር ውስጥ የሚገኙ ግብዓቶችን ለመግዛትና ለባለሙያዎች የሚወጡ ወጪዎችን ማዕከሉ የሚሸፍነው ከመንግስት፣ ከግለሰቦችና ከተቋማት በሚያገኘው እርዳታ ቢሆንም፣ አሁን ላይ የችግሩ ጥልቀት ከሚገኘው ድጋፍ በላይ ሆኗል የሚሉ ጉዳዮች እንደ ችግሩ መነሻ ተጠቅሰዋል።
​
​ይህ ማዕከል በሳምንት ሁለት ቀን አገልግሎት ማቋረጡ የብዙ ህጻናትን ህይወት ፈተና ላይ ይጥላል፤ ምክንያቱም ማዕከሉ፦
​በየቀኑ ከ 6 እስከ 8 ለሚደርሱ ህጻናት የልብ ቀዶ ህክምና ይሰጣል።

​በተመላላሽ ክፍል ደግሞ በየቀኑ ከ 90 እስከ 100 ለሚደርሱ ህጻናት ህክምና ያደርጋል።
"ችግሩ ከፍ ያለ በመሆኑ አሁንም እንደ ትላንቱ ለህጻናቱ በሚፈለገው ልክ መድረስ አልተቻለም" ያሉት አቶ ህሩይ፣ የህጻናቱን የልብ ምት ለመታደግ ይቻል ዘንድ ከመንግስት፣ ከተቋማትና ከደግ አድራጊ ግለሰቦች የሚደረገው ድጋፍ ተጠናክሮ እንዲቀጥል አስቸኳይ ጥሪ አቅርበዋል።