የአፄ ቴዎድሮስ ቅርሶች ከ158 ዓመታት ስደት ቆይታ በኋላ ወደ ሀገር ቤት  ተመለሱ!

​ከአንድ መቶ አምሳ ስምንት ዓመታት ረጅም የስደትና የባዕድ ሀገር ቆይታ በኋላ፣ የኢትዮጵያ ኩራትና የክብር መገለጫ የሆኑት የአፄ ቴዎድሮስ ቅርሶች ዛሬ በታላቅ ክብር ወደ እናት ሀገራቸው ተመልሰዋል። በመቅደላ ጦርነት ወቅት በወራሪው የእንግሊዝ ጦር ተዘርፈው የነበሩትና የታላቁን ንጉሥ ማንነትና ወታደራዊ ግርማ የሚመሰክሩት የእጅ ወርቅ አምባር፣ የፀጉር ቁንዳላ እና የሸማ ሸሚዝ ቁራጭየታሪክን ፍርጃ አልፈው ዛሬ የኢትዮጵያን አየር ዳግም ተንፍሰዋል።

​ይህ ታሪካዊ ክስተት ዝም ብሎ የንብረት መመለስ ሳይሆን፣ ለዘመናት የተቆለፈ የታሪክ ቁስል የሻረበትና የኢትዮጵያ የዲፕሎማሲ ድል የታየበት አጋጣሚ ሆኖ ተመዝግቧል። የኢትዮጵያ ቅርስ ባለስልጣን ዋና ዳይሬክተር ረዳት ፕሮፌሰር አበባው አያሌው እንደገለጹት፣ ቅርሶቹ ወደ ሀገራቸው ሊመለሱ የቻሉት በመንግስት በኩል በተደረገው የማይነጥፍ የዲፕሎማሲ ጥረትና በሁለቱ ሀገራት መካከል በተደረሰ ጥንቁቅ ስምምነት ነው። ዳይሬክተሩ አክለውም፣ ይህ ስኬት የመጨረሻው ሳይሆን በተለያዩ ምክንያቶች ከአገር የወጡ ሌሎች በርካታ ቅርሶችን ለማስመለስ ለሚደረገው ብሔራዊ ዘመቻ ትልቅ መነሳሳት የሚፈጥር መሆኑን አረጋግጠዋል።

​ባለፉት 158 ዓመታት በለንደን ሙዚየሞችና በግል እጆች ውስጥ የቆዩት እነዚህ ቅርሶች፣ ዛሬ ወደ አባቶቻቸው ምድር ሲመለሱ ኢትዮጵያውያን በታላቅ ስሜትና በአክብሮት ተቀብለዋቸዋል። ይህም "የታሪክ ባለቤቶች ታሪካቸውን አያጡም" የሚለውን እውነት ለዓለም ያስመሰከረና የኢትዮጵያን የጥንታዊነትና የሉዓላዊነት ክብር ዳግም ከፍ ያደረገ ኩነት ሆኖ ተመዝግቧል።